Latest update August 6th, 2026 12:35 AM
Latest News
Dem boys seh…Sam Blinds fetch peas and rice to Jamaica
Old people does seh dat there is a time and place to do things.
If you gun guh to a fancy restaurant they gun expect you to eat with knife and fork. When yuh hear de national anthem, yuh gat to stand up straight. When yuh enter a room acknowledge dem who inside.
Is just like dem politicians, when dem go to certain events dem does wear clothes that suit de occasion.
Tek Sam Blinds for instance. He gat clothes for all occasions. Dem boys see he with dashiki, khurta, dowti and he even gat clothes fuh dem Chinese function. He does even fold he hand like dem Chinee.
But is when Sam went to Jamaica this week fuh dem 50 years anniversary that dem boys realise that Sam is a special person. He is truly de ambassador fuh de Guyanese people. Imagine Sam sit down with a set a big shot like Louis Farrakhan, Colin Powell, Jacob Zuma and Portia Simpson-Miller. Dat is like sitting with royalty. You can’t get better than that.
Well de Jamaican people putting on a great show and all dem big one paying keen attention. All ah dem but one!
Guess wha Sam doing? De man tek out a plate with peas and rice with fry fish and start eating. Farrakhan watching he sideways and turn up he nose, cause like de fish de smellin like it off. But Sam like Bharrat Ramroop, he ain’t care wha people think. If yuh see how he watching de food like is last he gun get.
Dem boys see he wid de plate and de tek he picture. It was a nice picture. It all over de internet…pun Facebook, pun Twitter, and even pun BBM, de man now more famous than Barack.
He like de exposure.
Is de same exposure that plenty people getting now. Dem boys down in Linden block de road and dem get exposure. Dem mek even the President writing letter to de papers.
Now dem boys at Bartica join in. Yesterday, dem boys light fire pun a mud road to Potaro. How dem do dat…nobody know. Dem boys hear dem chanting ‘slow fyah, mo fyah’.
Dem protesting how de road bad. Dem had de firemen busy. As soon as dem light fire pun de road, the fireman out it. De firemen dem get bassidy running up and down.
De next place dey might protest is by De Rat and Brazzy, because everbody want pension like wha dem two getting.
Talk half and keep dreaming ‘bout a massive pension!
Share this:
Discover more from Kaieteur News
Subscribe to get the latest posts sent to your email.