Soulja Bai give ee doctah stress over shoes

Mar 18, 2018 Dem Boys Seh, Features / Columnists

Guyana got stress wid de oil and de way how de govt handle it. Dis stress carrying people to dem grave but dem boys know how to handle it.
Dem realize dat at de end of life what really matters is not what we bring, but what we build; not what we got but what we shared; not our competence but our character; and not our success, but our significance.
Dat is why dem boys seh live a life dat matters. Live a life of love and to hell wid de stress.
Soulja Bai had nuff stress after de oil contract sign, suh he guh to de doctor. De doctor tell him something, then give him some tablets and something in a nursing bottle to drink.
Yesterday, dem boys hear he go back quietly to de doctor, smiling, because he going out de country today.
De doctor ask him what he do about de stress whah tek over him de last time?
Soulja Bai tell de doctor dat he went to de Hindu Temple some nights and he went to de Masjid some days.
De doctor surprise. He seh, “What? You guh dem place to pray and meditate?”
Soulja Bai seh, “Nah, nah. I been deh and mix-up all dem shoes dat dem does keep outside dem Masjid and Hindu Temple.”
He seh when he done mix dem up, he does go and stand up at a distance and laugh as he watch people get more stress than he, trying to find dem shoes.
De doctor watch ee good in ee face and seh, “Wait, you is de Mofo who had me looking fuh me shoes and couldn’t find dem last week Friday at de Masjid?”
Soulja Bai laugh and run out de doctor office. Dem boys hear he run straight to de airport and gone to Brazil but de doctor waiting patiently fuh when he come back.
Talk half and tek a page from Soulja Bai book on how to deal wid stress.

Discover more from Kaieteur News

Subscribe to get the latest posts sent to your email.

Latest News