Latest update August 7th, 2026 12:35 AM
Latest News
- ExxonMobil confirms US$55B investment in Guyana recovered
- Eight countries ‘strongly denounce’ ongoing Israeli violations in Gaza
- Father of two killed in accident at Coverden
- Bicycle bandits rob pensioner at gunpoint
- Disciplinary action pending against worker accused of withholding cash grant cheques – Region Six REO says
Cabinet mek mockery of bid process
Kaieteur News – Dem boys seh is one thing fuh a country to be in a mess, but is another thing when de people in charge decide to stir de pot wid dey own spoon.
De Cabinet seh dem give a no-objection to a consultancy contract fuh GPL, even though de evaluation committee did done do dem work. Now everybody asking: which evaluation committee Cabinet using? One from de moon?
Yuh can’t have two man driving de same minibus at de same time. One gon mash brakes, de next one press gas—next thing yuh end up in de trench. That is exactly wah going on wid this contract. Dem boys seh de evaluation committee check all de bidders and rank dem. Is not ludo dem playing. Criteria set, points tallied, and a man win. But then Cabinet seh, “Nah man, we like dis other fella more.” So just like dat, de rules change. Imagine yuh writing CXC, get a Grade One, and dem tell yuh, “Well, we feel like giving de prize to de boy who fail, cause he father got a nice smile.”
Wha kinda madness is dat?
Dem boys seh this is why Guyana always feel like it hustling backwards. We talk big talk bout transparency and competitive bidding, but behind de curtain, is everybody whispering and shifting goalposts. If Cabinet can override a whole evaluation process, why we wasting time and money pon tendering at all? Just throw names in a hat and let a lucky dip decide.
Dis parallel process is like watching two movies pon de same screen. Nobody know which one is real, but de popcorn still expensive and de ending always end up stink. If dis is how decisions getting mek, then don’t blame de people fuh thinking something fishy going on. Cabinet done turn de process into a catfish pond.
Dem boys seh is one thing to lose faith in politicians, but when yuh lose faith in de process too, then yuh know de country in real trouble. Transparency dead, and Cabinet helping bury it.
Talk half. Leff half
Share this:
Discover more from Kaieteur News
Subscribe to get the latest posts sent to your email.
Similar Articles
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
