Latest update April 26th, 2026 12:45 AM
Latest News
Babies want dem own money!
Dem Boys Seh…
Kaieteur News- Dem babies vex bad! Is protest time! Dem seh de government bringing a cash grant fuh newborns, but dem nah see one cent. Instead, is mommy and daddy collecting, and dem babies deh deh sucking finger—literally.
One baby hold up a placard—of course, somebody had to hold it fuh he—saying: “Meh want meh money, not pampers!” Another baby bawling out, “Milk expensive, but so is meh trust issues!”
Dem babies demanding justice. Dem seh dem got rights, even if dem cyan walk yet. One lil’ activist baby seh de government should hand over de money straight to dem. If dem can’t spend it, at least put it in a bank account so when dem turn big, dem can buy what dem really want—like more toys and less bedtime.
Dem boys hear one baby, whose mommy and daddy separate, ask a serious question: “Who getting de money in dis situation?” If is de mother, de father gon vex. If is de father, de mother gon call lawyer. If is granny, de whole family gon start side-eyeing she. One set ah babies seh dem done fed up wid how big people controlling everything. Dem seh if dem coulda talk, dem woulda call press conference like Jagdeo and tell de nation: “We want transparency! We want accountability! We want spending power!”
Dem boys seh dis is a real problem. Yuh cyan trust big people wid money. Give dem $100,000 fuh de baby, and next thing yuh see is mommy getting new nails and daddy buying Guinness. Meanwhile, de poor baby still deh in hand-me-down clothes from cousin who done ten years old.
Dem babies seh dem need action now. If de government cyan’t put de money in dem hands, at least give dem some control. One baby seh he willing to negotiate. Dem boys seh de revolution start early. First is newborn cash grant, next thing dem babies gon want pension too!
Talk half. Leff half.
(Babies want dem own money!)
Share this:
Discover more from Kaieteur News
Subscribe to get the latest posts sent to your email.
Similar Articles
THE BLUNT OF THE DAY
Sports
Features/Columnists
Sir. Ronald Sanders
The GHK Lall Column
Weekend Cartoon
