Small days deh pun meh mind

Mar 29, 2026 Dem Boys Seh, Features / Columnists

(Kaieteur News) – Dem boys seh when dem was lil pickney running round pon dusty village ground, cricket was serious business—but not too serious. If yuh get out early and yuh vex, yuh might pick up yuh bat and march off home in protest. Game done.

Or if dem boys pick team and yuh name ain’t call, yuh does suck yuh teeth loud, pick up yuh bat or ball or both and walk home slow-slow. And again—Game done!

Simple times.

But nowadays, dem boys hearing some new kinda madness. Instead of storming off like a proper vex cricketer, some people breaking bottle and sprinkling glass all over the pitch like is pepper sauce on cook-up rice. Game done—but now is emergency ward next stop!

Dem boys scratching dem head. Since when losing a toss or not getting pick turn into a crime scene? Is cricket or is action movie? One minute man arguing about LBW, next minute yuh wondering if yuh need steel-toe boots to field at cover.

Dem boys seh, imagine the commentary:
“Here comes the bowler… short run-up… oh wait! Match halted due to shards of bottle at mid-wicket!”

Even the umpire afraid to raise he finger—because he might raise it and get puncture!

Now dem boys asking a serious question under all the joke: dem authorities ain’t got a charge fuh this kinda foolishness? Because this ain’t just bad sportsmanship—this is turning a friendly game into a survival test. Next thing yuh know, man carrying tetanus shot in dem kit bag along with bat and pad.

Cricket is supposed to build character, not test how fast yuh could dodge broken glass. Back in the day, the worst thing yuh had to fear was a fast bouncer or a cousin who like to cheat the score. Now is broken glass bottle on the pitch and field.

Dem boys seh if yuh so vex that yuh nah get pick, go home and eat a mango, cool yuhself, and come back next match. Don’t turn the pitch into a minefield. Because at the end of the day, cricket is about bat, ball, and a little bacchanal—not bloodshed.

And if yuh really want stop the game? Simple—take the ball and hide it like old times. At least nobody ain’t got to visit the doctor after that!

Talk half. Leff half.

Discover more from Kaieteur News

Subscribe to get the latest posts sent to your email.

cricket, Dem Boys Seh, pickney, Small days

Latest News