Everybody Want a Run-about Now

Jun 28, 2025 Dem Boys Seh, Features / Columnists

Kaieteur News – Dem boys seh Guyanese always finding a way to mek a dollar. If it got a crack in de economy, somebody gon squeeze a hustle through it. De latest invention? A Run-about Man. Is not a new kinda minibus, is a real human being who gon run about fuh you.

Yuh hear right. Yuh too busy to go GPL, he gon go. Yuh too vex to stand in line at GRA, he gon stand. Yuh too tired to go collect de lil package at de shipping company, he gon hustle it fuh you. All yuh gotta do is call, pay a small fee, and BAM—things getting done while you home soaking yuh foot in warm water and sipping bush tea.

Dem boys seh dis new service more reliable than some government office. De Run-about Man does actually reach. And fast too. He like a cross between a courier, a peacemaker, and a professional time-saver. One woman seh she send he to buy she groceries, pay she internet, and drop a breakup letter to she ex—all in one trip. Efficiency like that woulda shock de Audit Office.

Is nuff people benefiting. De office wukker who can’t sneak out fuh two hours to go pay rates and taxes. De pensioner who fed up waiting pon minibus. And de small businessman who cyah afford to leave he shop. This Run-about Man is like a genie, except he don’t give three wishes, he charging by the hour.

Dem boys seh pretty soon, we gon get “Run-about App” where yuh just press a button and a man in track pants and slippers show up at yuh gate ready fuh errands. Yuh can even rate he—five stars if he jump a pothole without spilling yuh flour.

But dem boys warning: careful who yuh send. One man send a Run-about fuh pay he light bill and end up in blackout still. Turns out de Run-about did run gone… with de money.

Still, dem boys seh this is Guyana at its finest. Hustle, creativity, and one good pair ah sneakers. Who need taxi to tek you to get things done, when you got Uncle Run-about?

Talk half. Leff half.

Discover more from Kaieteur News

Subscribe to get the latest posts sent to your email.

creativity, Dem Boys Seh, GRA, Hustle, Run-about Now

Latest News