Latest update April 24th, 2026 12:40 AM
Latest News
Faithful to a Fault
Dem Boys Seh…
Kaieteur News- Deh had dis woman who tek loyalty to a next level. She husband was a regular “man of de night.” He lef home more than de moon does. And every time he come back, he bring sweet talk and some cheap cologne smell pon he clothes. De woman seh, “Is alright. Is me man. Me nah leff he.”
She cook he food. She wash he clothes. She even iron he shirt to go out and look fuh more woman. De neighbours use to laugh and whisper, “She blind or what?” But she seh, “Love is blind. And me loyal to de end.”
Then one day, somebody ask she, “Why you stayin’ wid he? He nah care ’bout you.” She seh, “Is me duty. Me nah give up.”
Same way some people loyal to political parties. De party does rob dem blind. Dem leaders does look after de big one and fly out first class when people deh home hungry. But de loyalists seh, “Is we party. Dem others worse.”
De party rig election like how de husband rig excuses fuh find time fuh deh with he sweet woman. Dem promise gold and deliver brass. Yet, de faithful seh, “We guh wait. Next time, we guh get better.”
De same way de woman mek excuse fuh de husband, de party supporters does mek excuse fuh de party. When dem nah get road, dem seh, “De oil money soon come.” When dem nah get school book, dem seh, “We got to tighten we belt.”
But hear dis. De husband lef one day and nevah come back. De woman bawl she eyes out. De party guh do de same thing like de man and walk away. One day dem guh run outta promises. And dem faithful guh lef wid nothing but tears and a ballot paper.
Dem boys seh, loyalty is a good ting. But loyalty to nonsense is madness. Yuh could only tek blindness so far before yuh start to feel de pain.
Talk half. Leff half
(Faithful to a Fault)
Share this:
Discover more from Kaieteur News
Subscribe to get the latest posts sent to your email.
Similar Articles
THE BLUNT OF THE DAY
Sports
Features/Columnists
Sir. Ronald Sanders
The GHK Lall Column
Weekend Cartoon
