Guard service ignore its own alarm

Jul 04, 2018 Dem Boys Seh, Features / Columnists

Everybody who got a business want to feel important. Dem does hire security firms to look over dem property. But even before dem hire de security company dem does put in alarm. These days dem boys does install camera.
Technology mek people can stay in dem house and see wha de cameras showing. Even when dem go overseas, dem can look back in Guyana and see wha happening. Dem boys use to seh dat rich people don’t sleep but now-a-days wid de security guards and de alarm and de cameras people does sleep.
Imagine how dem boys feel when de wake up and hear dat people rob L. Seepersaud Maraj and Sons. Whoever do it clean up nearly $100 million. De money and de jewellery was so much dat de people who cut open de safe lef everything dem come wid. Dem lef de cutting torch, de lighter, de chemicals and all de things dem carry to break in de jewellery place.
But wha nearly mek dem boys faint is when dem hear dat de security company didn’t even budge when de alarm go off. Now de security company had to know dat it protecting millions of dollars; it hear de alarm and it ain’t respond.
De security company just like dem in de States, does call de person when de alarm go off. Dis company didn’t call. If de alarm did go off one time was something; it go off three times and none time de security company call de business place.
Is now people starting to look at de security company. If it hear de alarm three times in about one hour and no guard didn’t lef to investigate, it got to protect who was cutting.
But then again security guards like sleep and all of dem was probably sleeping. When dem hear de alarm dem just open dem eye and turn over. De police questioning nuff people. But one thing fuh sure, whoever selling back de jewellery got to melt de gold because everybody know Seepersaud Maraj gold.
Talk half and study who can lose $100 million and don’t even blink.

Discover more from Kaieteur News

Subscribe to get the latest posts sent to your email.

Latest News