Latest update April 12th, 2026 12:50 AM
Farmer sorry Jagdeo wasn’t in de Prado
De whole world know politicians does lie. Some of dem does lie through dem teeth. Dem boys remember a Prado accident a few years ago.
De Prado was fetching some politicians when it crash. Jagdeo wasn’t inside. A farmer run up and bury everybody.
When people tun up, de farmer tell dem dat he bury everybody. He seh some of dem was waving and hollering how dem alright. But he tun and tell de crowd, y’all know how dem politicians does lie suh I just bury all of dem.
And if Jagdeo been deh, he woulda been de first one to get bury. He got a brain dat don’t forget nutten.
If he give you two house lot or a duty free car to a public servant, he remember 20 years from now.
He could tell you quietly every cent he spend, wheh he spend it, how he spend it and who and what it spend on. He don’t forget nutten.
But when you talk bout lie and when he nah want to tell de truth, he dance Dhaka Dalay.
A reporter ask him, wha he do wid all de oil money he collected from all de oil companies during de exploration phase.
Jagdeo guh round de world, then tun and carry de reporter round de moon and de stars.
Then he finally tell she, he can’t remember; but de Auditor General can check and dem can see how de money spend and wheh de money gone.
Dem boys remember when Jagdeo promise to sell he chandelier in ee house to de Waterfalls boss man—not de one upstairs but de one downstairs.
He claim how he buy a cheap one and he would smile if he get US$10,000 for it. De Waterfalls boss man tek up de offer. Jagdeo change ee mouth and seh he want US$25,000.
De boss man write de cheque and he had to cancel it because Jagdeo nah tekking it. He was bluffing because he know de real value of de chandelier—US$500,000.
Dem boys did want he forget de real value and sell it fuh de US$25,000 de same way how he want people to believe he forget wheh de oil money gone.
Talk half and de boss man still want de chandelier.
Share this:
Discover more from Kaieteur News
Subscribe to get the latest posts sent to your email.