Bull Kak gun deal wid de Clown Clerk and de Town Clown

Feb 27, 2018 Dem Boys Seh, Features / Columnists

Life is a small gap between birth and death. In this gap be happy and try to mek oddas happy…Enjoy every moment of life.
That is wha somebody tell dem boys yesterday after dem see de ad how Exxon giving Guyanese a little over half loaf bread a day fuh de oil. Dem get upset and know that dem boys gun get more upset. That is why dem send that message to clam de nerves.
De thing did wuk because dem boys was calm throughout de day until dem hear de wickedness wha come out de Clown Clerk mouth. He seh he give out a contract fuh $100 million to clean up de Le Repentir cemetery.
When asked by de Waterfalls reporter why there was no tender fuh de contract, de man seh was an emergency operation. When dem boys hear that answer dem did feel fuh drop dead and get a clean spot in de cemetery fuh lie down.
Dem boys seh is either de dead had to go out or de Clown Clerk and de Town Clown dream de dead coming fuh both of dem.
Dem boys does pass deh every day and all dem see is li’l fire wha two li’l boy light fuh bun out de bush between dem grave.
Dem boys hear one of de li’l boys happen to be de Town Clown son.
Dem boys seh de odda day de council didn’t had money to pay wages and salaries. Dem don’t pay de people NIS; City Hall falling apart; a big hole deh right over dem head and dem can’t fix it.
Yet dem seh dem find for emergency $100M fuh light fire in de cemetery. That is wha dem want Guyanese to believe.
Dem boys believe dem pocket de bulk of de money. De only thing wha dem pay for is de box of match and de li’l kero.
Talk half and hope Bull Kak drop de Bull and send wha lef to de Town Clown and de Clown Clerk.

Discover more from Kaieteur News

Subscribe to get the latest posts sent to your email.

Latest News