Promoter bring fake artiste to Guyana

Mar 28, 2017 Dem Boys Seh, Features / Columnists, News

Since Trump tun President he start talk bout fake news. Since he open he mouth is fake news. Jagdeo believe he is Trump and he and all start talking bout fake news.
Dem boys seh Trump and Jagdeo is de biggest fake de world produce and still have to put up wid, one way or another.
Nuff people learn from de two of dem. Last weekend a music promoter host nuff show all over de country. He announce a name and advertise a photo that he bringing Johnny Lever, a top Indian comedian.
De advertisement had de real Johnny Lever photo and de whole Guyana believe. Dem rush to de stadium fuh de first show. When dem tun up dem see a Johnny but this one look like he come from Corentyne. He look just look like Lever. De trouble start when he open he mouth. He sound like a true Berbician and he get pelt by de real Guyanese.
Dem boys seh you does only fool people one time. De next night de show was to go on in Berbice. Johnny couldn’t mek it because some good brick ketch him in town. He seh wha miss you don’t pass you and he ain’t going fuh dead.
De people who been at de stadium seh de promoter is a fake promoter and from now on All of dem must bring their artistes and performers one month in advance so people can inspect dem, properly.
Dem boys seh de police who inspect de businessman and calling him a trunker should have been at de stadium. De businessman was outside de bank waiting fuh he wife who went and draw a million dollar.
He tell de policeman he waiting fuh he wife but de cop still march him down to Brickdam and got he wife stranded wid de money outside de bank.
According to de wife de police dem fingerprint him and dem finger him before dem let him go.
Talk half and careful wid you trunk and de police.

Discover more from Kaieteur News

Subscribe to get the latest posts sent to your email.

Latest News