Dem boys seh...Dem big people cry

Dem boys seh…Dem big people cry

Dec 27, 2009 Dem Boys Seh, Features / Columnists, News

On Christmas Day some big man cry fuh break dem heart. Dem had to peep through bars and watch people laughing and dancing pun de road outside dem cell. Every other day dem woulda tek the scene fuh nutten but was Christmas and when dem look outside dem start fuh cry.

Two of dem who cry deh pun Death Row. Dem boys seh that one of dem cry because one of dem see he wife passing arm in arm wid another man. And he kill because of she.

But most of de others was dem boys who thief. Dem cry because dem get ketch and when dem look out and see people wid gold and money and know that dem can’t thief, was time fuh cry.

But some people cry outside too. One man cry because he wife lef he in September and carry way de children in October. He alone had to wake up, and all because he use to treat every day like Christmas Day and he deh drinking all over de place.

Some people cry fuh dem cow and sheep that disappear. Dem boys seh that normally, people don’t let out cow and sheep and fowl at Christmas because that is de season when pot does talk.

But some people don’t hear and is now dem miss de cow while some people get a great pepper pot, some get nuff roast beef and others, curry mutton.

Some woman cry too. Nuff of dem lost dem boy friend and a few had to surrender to de wife. All of dem complain how loneliness is a bitch and how dem gun tun over a new leaf in de New Year.

Last year was de same thing.

Children was de happiest. Dem didn’t care if Christmas fall pun Good Friday because dem know that dem didn’t got to go to school and of course, dem have friends who always willing to share wid dem.

Dem boys seh that big people different. Dem does share whole year and stop sharing at Christmas.

Talk half. Lef half.