Sweetness trap some thiefing ants

Sep 04, 2009 Dem Boys Seh, Features / Columnists

Guyana is one big sugar bowl and de people is like nuff ants. Dem boys come to dis conclusion de other day when dem read de papers. Dem read bout some people who decide dat de money in de country is fuh dem alone and de people must get de crumbs.
De thing is dat nobody ain’t realize wha did happening till de Waterfalls paper buss out de story. A reporter examine a project and find dat something wasn’t right. Some of de prices look high—too high—so dem decide to check wid some of de people who selling de products.
Well dat was another story because all of a sudden de people refuse to talk. Was like if somebody call dem and tell dem dat dem mustn’t seh nutten.
Dem boys remember dem mother when she didn‘t want to see de people who she owe. Dat is when dem boys use to tell de people “Mommy seh dat she ain’t deh.” Don’t talk bout de blows later. “You ain’t got sense? Is dat how you does pass message.” Well de people who supplying de products ain’t deh.
Was nuff like dat and one day one of dem boys was mekking some tea when he notice a whole heap of ants in de sugar. Some was outside trying to get in but de cover was on. Dem inside get lock down.
Dem probably start off using dem hand from outside but then dem decide to go inside because de hand was too slow.
Was a time when people use to thief by sticking in dem finger in de sugar bowl. Then you had another time when people use to push dem whole hand in de bowl. Today, according to dem boys, de people crawl inside de bowl just like dem ants and dem get lock down.
When de man did fall in de rum vat, he continue to drink till he couldn’t drink no more. Was de same thing wid de man who go inside de store after it lock up. He eat and drink and drop to sleep. Don’t ask. De owner ketch he sleeping de next day.
Well according to dem boys, this set who deh in de bowl ain’t want come out and de owner frighten to look inside because he frighten he gun get blame fuh being slack to allow so much ants to get inside.
Dem boys seh dat de owner trying to create diversion because he ain’t want nobody to peep too much in de bowl. De Waterfalls paper peeping and it ain’t like wha it seeing.
It seeing a lot of mess. Now dat is something dat does come naturally to anything when dem eat. Dem ants having a fine time but sugar does drunk people. And nuff of dem drunk.
Dem boys seh dat some of dem suh drunk dat dem ain’t even seeing straight. One of dem claim how he try fuh buy some things from overseas and couldn’t get it. Dem boys seh dat it had to be the biggest joke because Guyana don’t mek nutten, not even bicycle spokes.
But this ant in de jar claim how he get de pump in Guyana. Dat mean dat de agency stock up knowing dat Guyana woulda buy. Pumps like dat got to be ordered. Dat is wha dem boys know.
Anyhow, it look like de local pump very expensive but dat is because de sugar drunk de buyer suh people charge anything. Is like a drunk man in a Chinee shop buying food. He got money and he pay any price.
Same thing wid dem night spots. You order drinks and you decide to pay when you done. De bill does be more than you drink because de cashier decide dat you drunk and dem pad up. Well dat explain how all dem contract so high.
De boys in de sugar bowl all drunk and de people charging any price. De money coming from de government.
Dem boys seh dat some drunk but dem not stupid. Dem mek sure dat dem pocket some of de money and is a lot of money.
Talk half. Lef half.

Discover more from Kaieteur News

Subscribe to get the latest posts sent to your email.

Latest News