Latest update June 7th, 2026 12:20 AM
Set de record straight ‘bout dem Digital School books!
(Kaieteur News) – Dem boys hearing nuff sweet talk ‘bout this new Digital School. Free classes fuh Guyanese, free classes fuh Caribbean people, free books, free everything—like Santa Claus open a Ministry and start wukin full-time. But dem boys got one lil question.
But dem boys gat one small, innocent, Sunday-school question: who give permission fuh all dem books dat de Digital School suddenly got online?
Now leh we tell yuh, in Guyana we know how to launch big fancy project. Cut ribbon, pop champagne, play drum, buss a speech, buss two more. But is de fine print dat does come back and bite yuh in yuh behind. Dem boys seh is one thing to promise “all books available online, free of cost,” but is a whole next thing when de publisher show up asking, “Excuse me, who tell y’all dat?”
Dem boys hear de books deh pon de platform—maths, science, English, social studies, de whole syllabus like if dem authors and book publishers sign over their copyright to Guyana in a Christmas hamper. Free? Is wha free? Free as in “no copyright fee”? Or free as in “the students ain’t paying but the government quietly paying behind de shop”?
Dem boys want clarity, because copyright is not no lil small potatoes law. Dat thing serious. Publisher ain’t playing. Some of dem does send lawyer letter before you even finish download.
Imagine students in de middle of CXC prep and next thing yuh hear: “Platform shut down due to copyright violation.” Dem boys seh dat would be more confusion than when GPL give blackout when election results being announced. And dem parents gon bend up like wire trying to understand how their pickney in a “digital school” but can’t read a digital book.
So leh somebody set the record straight. De nation need to know: permission deh or permission ain’t deh? Fee pay or fee ain’t pay?
Dem boys seh transparency cheaper than lawsuit. And far less embarrassing too.
Talk half. Leff half
Share this:
Discover more from Kaieteur News
Subscribe to get the latest posts sent to your email.
Similar Articles
THE BLUNT OF THE DAY
Sports
Features/Columnists
Sir. Ronald Sanders
The GHK Lall Column
Weekend Cartoon
