Tek yuh licks and walk away

Sep 08, 2025 Dem Boys Seh, Features / Columnists

Kaieteur News – Dem boys seh is not everything you must ask fuh twice. Sometimes when you holler “gimme more,” is lash yuh does get. Ask Rabbi Washington. De man appeal he sentence hoping de judges gon seh, “Alright boss, tek lil less time.” Instead, de judges turn round and double de dose. Fifteen years turn into more. Instead of freedom, was more iron gate and cockroach company.

Well, fast forward to 2025 and de APNU decide dem gon try de same trick. Dem seh, “We can’t lose Region Four. We had all we big brains and all we polling agents watching.” So dem ask fuh a recount. Dem boys seh recount does sound sweet till yuh see de numbers. When de box open and de figures call out, APNU bawl louder than a man who miss he bus in de rain. Instead of votes adding up, de thing subtract. De more dem count, de less dem get. Dem lose seven votes.

Is like ordering a second plate of cook-up and finding out is just peas left back in de pot. Dem boys seh de recount didn’t tek away from nobody else—just from dem. Was like de cake jump off de table and land straight pon dem face.

Now dem supporters deh watching puzzled. Dem seh, “But we had man in every station. How come we ask fuh recount and we end up worse off?” Dem boys seh is simple: when yuh think yuh smart and try to play big brain games, sometimes de universe does give yuh a reminder—yuh ain’t smarter than arithmetic.

So de moral of de story: don’t always holler “check it again.” Sometimes better to tek yuh licks and walk away. Rabbi Washington learn dat in de courtroom. APNU learn dat in de recount. And dem boys seh if yuh don’t learn from other people mistake, de cake gon always find yuh face.

Talk half. Leff half.

Discover more from Kaieteur News

Subscribe to get the latest posts sent to your email.

Latest News