De Big Man na pay, but li’l man getting’ squeeze

Jun 07, 2025 Dem Boys Seh, Features / Columnists

Dem Boys Seh…

Kaieteur News – Dem boys seh is only in Guyana yuh could bring in a second-hand car fuh $1.2 million and end up paying $2.4 million in duty. De taxman does clap two setta charges pun yuh like if de car coming wid gold rims and bulletproof doors.

But leh a foreign oil company bring in a whole ship—yes, a floating platform wuh look like a city pun water—and dem na pay a cent duty. Everything tax-free. Even de oxygen de workers breathing pun de vessel might be exempt.
Dem boys seh when ordinary man go pun a lil holiday and bring back a blow-dryer or one electric shaver, customs does watch yuh like yuh trying to smuggle uranium. “Yuh declare dis?” they does ask, while peeping in yuh suitcase like if it got secrets. Next ting yuh know, yuh paying $5,000 duty fuh something yuh pay $3,000 fuh. Meanwhile, oil company bring in million-dollar equipment fuh free—and still asking fuh tax refund!

One oil company even invite one of we representatives to a fancy FPSO launching. Nice gesture, right? But dem boys seh guess wha? De bill end up pun we. Yes! We, de taxpayers, paying fuh de trip is like if a man invite yuh to a wedding and when yuh reach, de waitress hand yuh de bill fuh de champagne.

Dem boys seh de ordinary man getting squeeze like cane in de factory, while big company walking ‘round tax-free like Sunday morning. Dem getting duty-free gas, duty-free parts, duty-free champagne—and still claiming expenses pun we.

Guyana turning upside down. Poor man paying to live, paying to die, and now paying fuh other people party too?
Dem boys seh is high time somebody check de balance sheet—before de country end up bankrupt but still footing de bill fuh other people expense.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, li’l man getting’ squeeze, pay, second-hand car

Latest News