Govt practising jumbie mathematics

Dec 25, 2018 Dem Boys Seh, Features / Columnists

A bird dat sitting on a tree never frighten de branch break because is not dat it trust de branch but it trust its own wings.
De lesson is, ‘Always believe in youself’. Dem didn’t strengthen demself when dem go to parliament. Dem boys seh if dem did strengthen demself, dem woulda been flying high.
De govt was not like de bird. De branch break and nobody didn’t ketch; dem fall hard. Dem can’t get up.
There is a saying. Don’t judge dem who does drink nuff, cuss down and behave rowdy. Judge dem quiet ones, de sneaky ones. Dem always up to something.
Dem had nuff quiet ones in parliament and Charran seh if was a secret ballot nuff others woulda vote ‘yes’ wid him. Dem boys ask him to call name and all he do is smile. He look like when a man use Viagra and it wuk.
Everybody know Viagra is like a zinc roof. If you don’t nail it good, it can end up in de neighba yard. Nuff men had to end up in de neighba yard. Charran end up in Canada.
Dem boys seh he had to tek a good dose because de screwing he put pon APNU+AFC dem still can’t recover. De man do wha Jagdeo couldn’t do. He alone put de government out of office.
Now he got dem trying to challenge dat 33 not greater than 32. But if he, Charranrass, did vote fuh dem de 33 woulda been bigger than de 32.
Dem become govt wid de 33. All de time, de 33 was bigger than 32. De govt tek nuff decisions fuh three and a half years. Only de odda day dem pass de budget and Charranrass mek de 33.
Now de same govt got headmasters, head mistresses and mathematicians playing around wid de figures. Dem boys hear de govt write 33 pon one sheet of paper and 32 pon anodda sheet and put de two pon a scale.
It’s Christmas today suh dem boys want to remind all Christians How is Holy Water made? You boil de hell out of it. Merry Christmas.

Discover more from Kaieteur News

Subscribe to get the latest posts sent to your email.

Latest News