72% voters shun PNC, PPP, and KFC in G/T

Nov 14, 2018 Dem Boys Seh, Features / Columnists, News

Monday was elections; by midnight people know de results and if this was de general elections nuff of dem politicians woulda commit suicide.
In Georgetown only 28 per cent people vote. In de whole country it wasn’t much more. Some people estimate it at 32 per cent of de population.
If that was not a message to de politicians change dem boys name.
De news was good fuh some people. Imagine, Jagdeo and Freedom House people was so excited that dem try fuh hold a press conference at two o’clock in de morning. Dem boys want to know which reporter gun come out she bed fuh hear that scamp Jagdeo talk at that hour.
De PPP get two times de number of seats in de G/T City Council because de PNC and de KFC people fed up and didn’t tun up to vote.
Dem boys seh is a big message from de people fuh de PNC and de KFC. Dem should tek note especially when de PPP could go in Buxton and beat de PNC.
Whole day Soulja Bai calling to find out wha happen but nobody tekking he call. Dem shame fuh tell de man that even Buxton dem get rejected much less fuh give de man de results.
Dem boys didn’t go and vote because dem predict this woulda happen because nutten change. In fact, everything that happening in Guyana today looking like an exchange.
When de PNC put back Patsy on de list was like putting back Jagdeo pun de ballot paper. Dem boys hear some people who go to de polling place watch de ballot paper, suck dem teeth and walk out when dem see Patsy face.
Dem boys hear Moses, de man who part de Red Sea, couldn’t part de people at Whim fuh run away from de licking he get.
Dem boys convince come 2020 you got to tie black cloth round dem neck and bury dem suh Guyana can breathe fresh again. A new dynamic political party is needed and dem boys planning to form it from now.
Talk half and pray fuh a new political culture.

Discover more from Kaieteur News

Subscribe to get the latest posts sent to your email.

Latest News