Soulja Bai putting ee foot in wickedness at O.P.?

Jul 13, 2018 Dem Boys Seh, Features / Columnists

Dem have wickedness coming from O.P and dem boys don’t want to believe that Soulja Bai directing it. However, if that is so he beginning to get just like Jagdeo.
Some of dem inside O.P. got problems wid odda people outside and to get at dem people dem using de heads of some state institutions to go after de people.
De heads does go after de people family just to get at de persons who dem vex wid.
Dem boys been hearing people talking and dem been getting complaints. Dem didn’t want to believe but when it home, it really open dem boys eyes to what really playing out.
Dem boys watching a few things and dem boys plan to raise this matter wid Soulja Bai before dem expose it.
Jagdeo use to do de same thing. He get Sattar fun go after de Waterfalls boss man. He use judges to go after Uncle Adam and Freddie.
Dem boys thought that dem days for discrimination, victimization and hate was over when de govt change.
Not fuh one moment dem boys believe that this thing woulda happen so close to home and so rampant.
One man tell dem boys that every adult member of his family is being a target and pressured.
Dem boys seh is a good thing Simona not wukking at O.P. because people woulda think is she. Everybody know she wicked and she doing wickedness.
It was a terrible thing she did de odda day to an ordinary security guard. She wrang to de man and then get de police to lock up de man. Then she go and sit down wid she driver and eat dinner like if nutten happen.
She go to parliament yesterday and when people ask she why she do wha she did, she watch dem reporter full in dem face and seh, “I don’t know wha y’all talking bout.”
It was then that Bishop Ten Edghill seh de Chinee food wha she eat eff up she memory.
Talk half and wait fuh see wha Soulja Bai gun do.

Discover more from Kaieteur News

Subscribe to get the latest posts sent to your email.

Latest News