Argentine police learn from Guyana

Apr 17, 2018 Dem Boys Seh, Features / Columnists

When people come to Guyana, dem does learn nuff things. Guyana had a police exchange programme wid Argentina. De local police go over there and learn to investigate crime properly. Last year, de Commissioner of Police boast how Guyana solve most of dem crime.
De Argentine police go back and a dozen of dem get lock up. More than 1,000 pounds of ganja disappear and dem tell de supervisor how rat eat it out. Now de detectives in Argentina trying to calculate how many rats it gun tek to eat 1,000 pounds of ganja; how lang it gun tek dem and wha dem gun look like.
Scientists seh that rats does eat anything but dem wouldn’t eat ganja. When dem ask de police wheh dem get de idea from, dem same police seh dat dem been to Guyana and rats does eat ganja and cocaine in Guyana.
De odda day a senior police had 10 pounds of cocaine in he desk draw. Only he know what it was doing there, instead of the storeroom fuh safe keeping. De cocaine disappear when de case had to go to court. De big man claim how is dem rat mek it disappear.
Rat does get blame fuh everything. Dem had Bar Rat. He get blame fuh nuff thing. Dem boys claim how he tek state land and build a mansion and when he done, he give he friends and family de rest of land. Is not easy!
Rat get blame fuh everything. Money disappear and de clerk dem telling de police is rat. Dem learn dat from de big rat who teach Irfaat.
Soulja Bai seh how rat mek he move out of State House. He seh every night, some big rat deh running all over de place and when dem tired, dem want crawl into de bed wid he and Sandra. He security did ketch one and after a good torture, de rat seh how ee cousin Bar Rat was de president and after he move out, he give dem de place.
Soulja Bai decide to move out and lef dem.
Talk half and watch how rat getting blame fuh everything.

Discover more from Kaieteur News

Subscribe to get the latest posts sent to your email.

Latest News