Everybody using Guyanese

Mar 10, 2018 Dem Boys Seh, Features / Columnists, News

In de days of slavery, de British use to bring food and feed de people. Wid all de fish Guyana got dem British use to bring salt fish and Guyanese stop eating dem own fresh fish and demand de salt fish. Potato, corn and everything dem use to bring in and de people was happy.
Times change and de Americans start to bring in clothes and shoes and corn beef and sardines and things like dat. Guyanese was happy. But times change again. Guyana clamp down on some of de things dat dem foreign people use to bring in.
But Guyana is a nice place. De people always looking outside. Dem boys seh dat if anybody want to hurt a Guyanese all dem got to do is stop him from getting a visa to Uncle Sam or Canada. Some of dem does commit suicide.
De odda day, Exxon come and right away de people smile. America come to Guyana. Just like how de embassy does tek dem money and don’t give dem a visa is de same way Exxon tekking dem money and tekking dem oil and giving dem nutten. But de people happy.
Dem business people seh dem can see dem way because de Americans tell dem suh. Every day de people coming wid new ways to tek de money from de Guyanese. Dem send some people from Guyana to get training overseas. Dem put de visa in de people hand everybody smile because dem know dem gun go pun a plane.
Dem don’t know dat de Americans does tek back de money dem spend. But fuh years dat is how dem foreigners does operate and de people don’t know better. Exxon seh Guyanese wukking wid de oil company but wha de people don’t know is dat all who wukking wid de oil company is de cooks, de watchman and de cleaners.
De big jobs going to Exxon and Guyana got to pay.
Talk half and watch how Guyanese keep getting used.

Discover more from Kaieteur News

Subscribe to get the latest posts sent to your email.

Latest News