Jagdeo tell Ashni hide, Brassy to swim to Cuba

Jul 08, 2017 Dem Boys Seh, Features / Columnists, News

Is two week now Jagdeo ain’t hold a press conference. When dem boys check dem find out that Jagdeo out de country. Lang time when Jagdeo was out, Rohee or de dummy use to hold press conference fuh talk a set o’ raat. Dem boys use that word ‘raat’ because dem got tie tongue.
Now dem boys seh is only Jagdeo can talk raat. Rohee seh he tired talking raat and Donald deh pun raat and de Chat-3 is a big raat.
De set of dem not only talking raat, dem writing a set o’ raat in de newspaper every day. Rob de Earth come back and he suddenly tun an expert. Dem boys know he was an expert collector from BaiShanLin. One day BaishanLin big brown paper bag buss in de rain when he was going in to Rob de Earth office. If you see green currency.
Dem boys seh now Soulja Bai talking green, Rob de Earth and de rest of dem was way ahead of him. Dem was handling green. Is de same colour have Jagdeo so busy outside de country. He trying to change de colour to hide it away.
He hear that Uncle Sam exposing everything dem do and finding every corner dem tuck de green. Dem boys hear this trip he meet Brassington and Ashni and tell dem to hide. He tell Ashni that he small and he can tuck in any factory in New York. He tell Brassington he is a different kettle of fish. Wid he size he can’t hide in no factory, not even in a whale factory. He got to mek up he mind to face de pumpkin jumpsuits or start swim to Cuba.
Talk half and wait to hear wha Jagdeo gun seh about de oil deal wha he sign wid dem predators.

Discover more from Kaieteur News

Subscribe to get the latest posts sent to your email.

Latest News