Dem boys seh...Nutten get ketch and he can’t seh nutten

Dem boys seh…Nutten get ketch and he can’t seh nutten

Aug 15, 2016 Dem Boys Seh, Features / Columnists, News

Long time when li’l children thief or try to thief and dem get ketch dem does react in de most funny way. Dem does hide dem hand behind dem back and bend dem head. When dem parents ask dem wha dem do dem don’t admit, but dem does seh “sorry.”
Nutten was just like dem li’l children. He try a thing and get ketch. When Jagdeo and de others in Parliament ketch him, he down he head and keep he mouth shut. When dem put pressure pun him, he mumble. Trotman had to holler pun him and tell him to seh ‘Sorry.”
Dem boys want to know who gun listen to him when he try fuh seh sorry. He might got to sit down in front of Soulja Bai because that is de only person who might listen. But he got to keep a wild cane because Nutten does always stammer when he do wrong thing and got to explain why he do it.
But if you think he is de only bad one, you got to look at GRA. De people in charge decide to spend money to rehabilitate some places. But dem boys seh that it look like if dem gun rehabilitate people too. Yesterday dem place this advertisement in de papers.
When dem boys read de advertisement de fuss time dem couldn’t believe. De now boss man seh how dem gun rehabilitate de headquarters in Essequibo.
That ain’t all. Dem gun rehabilitate de customs officers too. Dem boys want to know how much nail and paint dem buy fuh wuk pun dem Customs officers.
Some of dem crooked indeed but de other day some of dem start to rehabilitate demself. Dem seize some smuggled fuel and hand it over. That is why de boss man decide that he should rehabilitate all of dem.
And dem boys hear that Nutten call Larry and tell him that if anybody ask him, he must seh that he never know Nutten and he wouldn’t seh nutten.
Talk half and wait fuh see Nutten try to explain why he try a hustle.