Dem boys seh...Bee Kay write love letter to Donald

Dem boys seh…Bee Kay write love letter to Donald

Jul 02, 2016 Dem Boys Seh, News

Old people always seh that cuss don’t have back door. De other thing that old people seh is that when shame sharing is more shame does come up.
Donald Dumb open he mouth and pick pun a man because de man seh he stupid. Of late Donald always writing something. If he ain’t defending Cheddi he cussing Gee Come. From time to time he does cuss de coalition and de coalition does cuss him back.
Dem boys seh he step out he crease. Jagdeo use to buy people. He use to give dem certain perks and dem use to stick dem nose up de place wheh de sun don’t shine.
Elections was coming and like when you light mosquito coil, people start to move away from Jagdeo and Donald. Of course de two of dem get vex. That is how Donald ask de coalition to explain why it give Bee Kay all de steel wha Surendra did buy.
Bee Kay get vex and he tell de whole world how he see why Donald get kick out from every post in de party. Then he ask Donald if ants eat out he brains, if he can’t remember that de whole transaction wid de Surendra steel was when he, Donald, was president.
Bee Kay produce de court paper to show that he get de steel as compensation in de court so de coalition ain’t got to explain nutten to Donald.
Who tell Bee Kay to do that? Yesterday Donald send a letter wha Bee Kay write couple years ago to Donald telling him how he like Donald. Dem boys wanted to know if it was a proposal letter wha old people use to call write home letter.
If you see de words. It was enough to mek a big man cry. Bee Kay pledge he heart, he soul and he behind. That is de letter that Donald release to embarrass Bee Kay.
Well this Bee Kay seh that he was born PPP but he now get sense. De story now start.
Talk half and wait fuh de rest of de story.

Discover more from Kaieteur News

Subscribe to get the latest posts sent to your email.

Latest News