Obama got plans fuh seven Guyanese

Mar 10, 2015 Dem Boys Seh, Features / Columnists, News

When you deh near to somebody who sick most times you does get sick. Like when somebody got de flu and dem go near to people who ain’t got it before de week out everybody gun get de flu. That is why nuff people worried.
Barak Obama get vex wid Venezuela and Guyana deh near to Venezuela. Dem boys seh that whatever Venezuela ketch Guyana gun get it. Well Obama ban seven Venezuelans. At first when he mek de announcement de report was that he ban seven people from a republic that got an Atlantic coast.
Donald hear de news. That is why he cut short he speech at Babu Jaan. Is when he come home that he hear is not Guyana, is Venezuela. But as old people seh, wha miss you nah pass you. Obama got plans fuh ban seven of dem in Guyana.
People don’t have to guess who is de seven because he don’t want dem to run from de jail that waiting fuh dem fuh all de wrang things dem do.
Dem boys seh imagine Bharrat Jagdeo got de nerve fuh tell de people that dem mustn’t watch he big house, that other people got big house, too. He coulda never wuk fuh money to build that house which mean that he indulge in skullduggery but he telling people fuh tun dem face.
Well Obama not tunning he face. He looking wid all he eyes and he got dem pun Jagdeo, Brassington, if only because he know de name from a previous encounter; Irfaat who he people does stop and question every time de man passing through de States; Ashni, Anil, who get poor when he tun a Minister, Barbie who brother did get touch up in de States and one of dem Brian.
If he ban dem is hell in de camp because Venezuela don’t trust some of dem Guyanese. But is only time.
Is only time that Jagdeo had to announce that de Pee Pee Pee is a coolie party. And that is how dem boys find out that Rohee is a coolie.
Talk half and look out fuh Obama.

Discover more from Kaieteur News

Subscribe to get the latest posts sent to your email.

Latest News