Doodnauth lef in limbo

Sep 25, 2009 Dem Boys Seh, Features / Columnists

De other day dem boys was going home. Dem deh pun de road and dem ain’t see a living soul. It was early in de night but yet de road empty. Dem boys remember the crime ways of a few years ago and dem wonder whether dem miss anything.
Dem keep on walking and is then dem realize that every house got de TV playing loud, loud. Was de tape involving Kwame and a li’l boy. Every now and then people either cussing or laughing.
This thing sweeter than African Moods, one lady seh. She tell dem boys that for a long time now she always mek sure that she deh home to watch African Moods because she like to hear how dem people does talk bout love and how dem does cry when things go against dem.
She also tell dem boys that long time she use to watch Indian movies fuh de same reason but she switch to African Moods because she can understand de language and because she ain’t got to read subtitles and watch de picture at de same time.
When dem boys sit down and start fuh watch, was like a love story. A man crying and boy telling he “Kwame, don’t cry. I didn’t mean to hurt you.” Dem also hear how one man ask de boy, “Wha I got to do to prove me love fuh you?”
Burt is de part wheh de boy talk bout how he frighten to have sex that mek dem boys tek note. Hear Kwame. “What are you afraid of? It is just like having sex with a woman.” Well is then de confusion start.
Dem boys notice that since that soap opera a notice appear in de papers offering Kwame a job. De notice dem in Thursday Chronicle near de bottom of page 23. It calling for cook/assistant cook to burst coconut, peal (sic) cassava, cut plantains, wash dishes etc.
Well right away dem boys know that anybody can create a job to suit any specification.
Perhaps cassava does peal like a bell. Anyhow, Kwame apply and he going for interview next week Tuesday.
But dem boys seh that dem had other shockers. Doodnauth Singh sell he soul fuh de PPP and de government. He and all crying like de man who de boy pun de tape call Kwame.
He wuk hard fuh years. He lef he lawyer wuk and tek a cut in pay. He help a President fight off efforts to keep she out of the presidency; he represent de party in de courts when people challenge de elections; he represent Bharrat when people claim that he owe dem.
A man name Norman Trotz had a hotel and de government bun it down. He go to court fuh compensation and Doodnauth fight tooth and nail till he lose.
Well Doodnauth now claiming that he wuk hard and de government refusing to give he all de pension and gratuity that he wuk for. Dem telling he that he got to prove that he pay tax and that he ain’t owe Khurshid.
Now dem boys want to know how de government can ask de man whether Khurshid. Dem was paying he and was dem duty to deduct taxes from he pay. Even when dem give he a contract dem use to tek out de tax.
Dem boys now know that when goat down looking fuh roll it does only seek out de smallest breeze. Dem feel de money too big suh dem finding excuse. That is wha dem boys seh.
Now dem telling Doodnauth that he should go to all dem contractors and beg dem fuh some of de money dem collect from de government. Fowl Cock alone can pay de man gratuity. Tul Seed can pay de pension. BK can pay both de pension and de gratuity.
And Bharrat done secure he pension and he ain’t resign yet. He still wukking, not paying tax, getting big pay and perks. He don’t drink and he don’t smoke
And de thing is Doodnauth sick suh dem boys want to know if de government decide to stretch he out because dem know that if he dead de claim forfeit.
Talk half. Lef half.

Discover more from Kaieteur News

Subscribe to get the latest posts sent to your email.

Latest News