Latest update September 6th, 2026 7:34 PM
Big Job, small chance
(Kaieteur News) – Dem boys seh lang time story sweet, but some ah dem story does bite yuh same way mosquito in rainy season. Back in de old days, once yuh get a wuk and yuh keep yuh head down, do yuh duty, sign in pun time, and avoid sleeping pun de desk wid de file as pillow, promotion used to come suh natural like sunrise. Yuh start sweeping floor, next thing yuh become clerk. Stay lil longer, yuh become senior clerk. Hang on some more, and one morning yuh name deh pun list fuh manager. Slow and steady used to win de race.
Nowadays? Bai, nowadays slow and steady does only win if de fast man lose he car key. Yuh could start at de bottom, climb to de middle, even get one toe near de top, and still nah reach nowhere. Plenty people wuking hard till dem shoes sole peel off, while some outsider parachute in from nowhere and land right in de big chair. Before staff could ask who de new boss be, de boss done ask where de AC remote deh.
Dem politician got nuff friends too. Every election season, people does smile till dem face hurt. Then after election, dem same smile turn into appointment letter. Some man nah know difference between stapler and scanner, but deh now in charge ah administration. If confusion was qualification, some ah dem got PhD.
Lang time everybody used to wait pun New Year’s Day fuh hear who get promote in de civil service. It was like second Christmas. Nowadays if yuh start at de bottom, yuh got better chance ah retiring wid de same bottom chair. Promotion scarcer than hen teeth and honest contractor.
It remind dem boys about one friend wah bin wuk in supermarket. He finally get promote and spend whole weekend boasting to he wife. Every five minutes: “Me get promote!” “Me moving up!” “Me important now!”
De wife get fed up and tell he, “Promotion nah mean nothing. Dem even gat supervisor fuh peas.”
De man vex and decide fuh prove she wrong. He call de peas section and seh, “Can I speak to de supervisor of peas?”
Voice pun de line ask, “Canned or frozen?”
Since den, he stop bragging and start shelling peas quiet quiet.
Talk half. Leff half
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
