Time fuh slowdown

Jan 29, 2026 Dem Boys Seh, Features / Columnists

(Kaieteur News) – Dem boys hear a man call in pun one road safety programme and drop one memory like is old-time calypso record. He say long, long ago—under Commissioner of Police Laurie Lewis—some minibus get device pun de accelerator to stop dem from flying like jet plane.

Dem boys scratch dem head till it nearly bald. Dem boys does remember plenty thing, but dat one hiding deep-deep, like old GTT phone book. De man claim dem bus had to come in regular-regular to check if de device still working, so de driver couldn’t press accelerator till it begging for mercy. If dat true, dem boys would like to know who put it and who tek it out—because since then, some minibus does move like dem late for funeral and wedding at de same time.

Now fast-forward to today. Government say dem bringing back dem devices, but this time for monster trucks. Dem boys nearly clap—till dem hear de proposed speed cap: 80 km per hour. Eighty! Dem boys nearly fall off de chair. At 80 km, some of dem truck does still look like dem auditioning for Fast & Furious: Guyana Edition.

Dem boys wondering: who exactly dem protecting at 80 km? Certainly not de small car that look like matchbox when a truck blink at it. And definitely not de pedestrian who crossing road with grocery and prayer. If dem serious ’bout road safety, dem boys feel truck speed should be capped at 60 km per hour. Sixty still moving, but at least you have time to shout “Watch out!” before disaster strike.

Dem boys not against technology. But technology without common sense is like putting lipstick on a bull. If dem want fewer accidents, slow down de big boys. Because when a monster truck in a hurry, everybody else end up in a rush—to hospital, police station, or insurance office.

Dem boys seh: remember de past properly before you repeat it… and slow down de trucks before dem slow down we—permanently.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, slowdown, time

Latest News