School sports does attract nuff hawks

Sep 23, 2025 Dem Boys Seh, Features / Columnists

Kaieteur News – De police gat to start going by de school sports. And nat only fuh deter dem urchins wah want tek way dem lil children cell phones.

A couple of years ago, dem boys pass by one ah dem secondary school sports. And dem boys notice a lot ah young men, driving cars and motorbikes, hanging outside de school sports. But dem was not only hanging out, dem was throwing nice words to dem young school girls when dem passing. Dem boys had to halla pun one ah dem and like he did want square up fu fight.

But he know dat he was not supposed to be out dere. He out dere with leering eyes fuh dem young school girls and dat is why Dem boys continue to insist dat no matter what is de age of yuh child, accompany yuh children to de school sports.

Deh gat some big boys who leff school lang now, who does be like chicken hawk waiting fu prey pon de lil school girls. And dat is so shocking and shameful.
De police need to go by dem school sports and be on de lookout fuh all de predators wah does deh liming by de gate and trying fuh form small talk with dem lil girls. De police should ask dem what dem doing dere and why dem outside de school sports.

We gat to protect we lil children from dese predators in society. Otherwise is sheer stress and problems gan come we way!

Schools sports does attract nuff hawks. And de most dangerous are de ones on land.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, Hawks, School sports

Latest News