Latest update July 30th, 2026 1:03 AM
Latest News
- Canadian firm pockets US$2.2B on Guyana gold field, country gets nothing
- ‘Indigenous people have suffered under ‘broken’ transport system for decades’ – APA’s Executive Director
- Protests spread to Den Amstel, Melanie over arrest of MV Barima crew members
- Opposition mobilises lawyers, warns families against signing compensation documents in MV Barima tragedy
- Taxi driver killed after truck collides with car at Goedverwagting
Boring de line become national sport
Dem boys seh…
Kaieteur News- Dem boys seh traffic does got it own Olympics in Guyana. De latest event is called “Bore de Line and Cut In Like Yuh Own de Road.” Is a real crowd pleaser—especially if yuh like cuss words, horn blowing, and watching old people faint in minibus.
Last week, traffic deh park up pon East Coast Road and de line ain’t moving for hours. But this time, no music, no dancers, just people watching dem clock and praying dem bladder hold out. Some wondering whether it was like de time when de funeral did snarl traffic on de same Road. But den them find out was a bridge that get put out of commission because some heavy trucks driven and bruk it up.
But dem boys seh de bridge was not de main culprit. De traffic been rerouting through other areas and while dat would slow de traffic it would not cause a logjam for hours. De real cause is de same old villain—Mr. Bore de Line. Every day now, yuh got drivers who feel de white line pon de road is decoration. Dey using de cycle lane, de pedestrian walk, and even de trench edge fuh overtake. Some trying fuh pass through people backyard now. Dem boys see one man overtake on a footpath and wave to a lil school child like he proud.
But when all dem bore de line and try fuh cut in back, guess wah happen? Traffic don’t move. Is like one big snake biting it own tail. And dem who waiting fuh hours? Dey does end up reaching home next day.
De police? Dem got PhD in watching. Dem boys seh if bore de line was a crime punishable by jail, we woulda need five more prisons and a holding cell in every trench. Right now, is like solving this problem require de same technology fuh launch rocket to Mars.
Dem boys seh is time we treat dis ting serious. Put one police at every choke point wid a notebook and a strong hand. Better yet, give dem a drone and a loudspeaker: “Step out de vehicle, yuh line bore!” Until then, de new national motto should be: “In Queue We Trust, Unless Yuh Got a Horn and a Big SUV.”
Dem boys seh if Moses did bore de line, he woulda never reach de Promised Land—he woulda get stuck pun East Coast.
Talk half. Leff half!
Share this:
Discover more from Kaieteur News
Subscribe to get the latest posts sent to your email.
Similar Articles
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
