wheelchair pushers at Ohh Pee

Dec 06, 2018 Dem Boys Seh, Features / Columnists, News

Parliament force some people to face dem own jumbie. When Soulja Bai been in de Opposition he and he parliamentarians notice that Jagdeo use to run racket. He use to hire people pun contract and pay dem more than public servants.
This cause big problems. Soulja Bai use to stand up in Parliament and vow to stamp out contract workers if he get in power. And every time he seh suh de whole parliament use to thump de table.
Up come election and Soulja Bai win. When dem boys look at de contract workers, dem see nuff. And was not dem alone. Jagdeo see de thing and he get he people to ask what about de contract workers. One man seh Soulja Bai and Li’l Joe see how dem can run racket.
If dem want to give anybody a job dem didn’t have to go through de public service; dem just got to give dem a contract job.
Dem boys seh dem could understand if Ohh Pee got more contract workers that when Jagdeo was president. Dem know that nuff old people wukking at Ohh Pee so dem have nuff wheelchairs. It gun tek contract workers to push dem around.
Of course, pushing wheelchair is a skilled job. If you miss, de person you pushing could fall out de chair. Nuff of dem fall out. And Jagdeo seh that is a good thing. He seh that none of dem coulda come out of parliament yesterday to meet de sugar workers who was protesting.
That protest was anodda story. De sugar workers claim how dem don’t have money to buy food. Dem boys want to know how dem find money to come to town. Some come from Skeldon. Jagdeo did talk to dem and when dem men ask he fuh a raise to pay dem passage back home he tell dem fuh ask Soulja Bai because he got to keep he money to pay lawyer in case SOCU charge him.
Talk half and count how many contract workers dem have now compared to when Jagdeo was president at Ohh Pee.

Discover more from Kaieteur News

Subscribe to get the latest posts sent to your email.

Latest News