Elections gun get like West Indies cricket—no support

Jul 05, 2018 Dem Boys Seh, Features / Columnists

People who like sports enjoying demself. Is World Cup football and of course dem have people who supporting any and every country. Most people supporting Brazil but dem have some who supporting France and some supporting Argentina.
Nobody ain’t supporting England although Guyana know bout England before dem know bout some of dem odda country. When Argentina get knock out to see some of dem people face was to believe that dem wife dead.
Was a time when West Indies cricket use to command such a big support. People use to lef dem house in Berbice since midnight to go and see a match by midday. Now cricket playing and people ain’t even got time.
West Indies bowl out a team fuh 43 runs and people didn’t even know because dem don’t care. Dem boys seh elections in Guyana getting just like that. People don’t care no more. Was a time when people use to lef dem house and walk miles to hear dem politicians talk. Now , dem politicians can talk till dem tun blue, is only certain mad people going to listen.
Dem boys seh when is time to vote people gun do just wha dem doing when cricket playing. Dem gun ignore de elections. Dem wouldn’t care because de politicians don’t talk to dem unless is elections time. Is like a man in he house. He will find out when he ignore he wife except at certain times.
Of course, Soulja Bai know de trend suh he forming a football team. He believe that once he got a football team people gun be following him. But he mustn’t forget that a whole football team trap in a cave.
De Chat-3 advising Jagdeo to open a soup kitchen. People like free food and once he feed dem everybody gun love him. That is wha de Chat-3 seh but Jagdeo want to know who buying de soup. De Chat-3 seh that Jagdeo got nuff money. Jagdeo tell him de money not in Guyana. And besides he don’t have anything to get because he can’t run fuh president.
Talk half and plan fuh attract people.

Discover more from Kaieteur News

Subscribe to get the latest posts sent to your email.

Latest News