De Waterfalls paper want find some politicians

Jun 15, 2018 Dem Boys Seh, Features / Columnists

Today is Eid. Dem Muslim brothers was fasting fuh more than a month. Last night was de big night. All who stick wid de teachings got every right to feel proud and happy. Dat is why dem boys understand when dem Muslims seh dis is dem Christmas.
All dem political party and trade union does find time to write. Dem does show off dem writing skills. All of dem does send greetings. De greetings dem does read de same way: To my Muslim brothers and sisters.
When is Easter dem does write: To my Christian brothers and sisters. When is Deepavali, de greetings does begin: To my Hindu brothers and sisters. Is years now dem boys reading de same thing, suh fuh now dem boys decide to ban de message.
Dem seh if de political parties and dem trade unions want to appeal fuh support, dem can pay fuh an advertisement. Already, dem political party owe dem newspapers a lot of money fuh ads wha dem tek out and wouldn’t pay for. Dat was since elections.
One newspaper printing a big notice dat instructing people if dem see Soulja Bai, Donald and Ram Jattan, fuh send dem to de Waterfalls paper advertising department. Money outstanding. Dem boys seh dat before de elections all of dem promise to pay.
Is like when a man love a woman. He does promise she de moon and de stars but as soon as he get wha he deh after, she cork duck. She can’t collect nutten. Wha got de Waterfalls paper calling fuh de money is because de company pay Statia already and dem want back dem money. Statia don’t give credit.
And dem boys plan to keep asking just like how Jagdeo keep asking de Government to trade. Was a trade offer fuh de High Court mek Jagdeo refuse to agree to de people who Soulja Bai pick.
And is another trade in GECOM mek some people mekking all dis noise.
Talk half and direct all dem party leaders to de Accounts Department.

Discover more from Kaieteur News

Subscribe to get the latest posts sent to your email.

Latest News