Guyana got nuff Andy Capp

Apr 05, 2018 Dem Boys Seh, Features / Columnists

One of de hardest thing is to find people to wuk. Some business people talking how dem looking fuh people and dem can’t find. But if you had to meet certain people you would believe dat dem ain’t got no wuk in de place.
Is now de Labour Bureau realize dat Guyana got nuff Andy Capp.
Don’t ask wha happening. Dem have people gon tun up and wuk fuh one or two day and then dem gon disappear. A man get a wuk as a labourer pun a building near de seawall. Dat mean dat he ain’t rich and he not too bright. Dem boys hear de man lef de wuk.
Dem have people who get a li’l hold on wid de City Council. Dem and all not too bright otherwise dem woulda tek one look at de Town Clown and de Clown Clerk and apply fuh a job as de Clown Clerk. Dem got to be elected before dem could be de Town Clown.
After de first pay day which does come at de end of de week is done dem done wuk. De police force got nuff of dem. Dem boys don’t understand why people does waste dem time calling fuh de police force to get more people. De more de force get is de faster de people does lef de wuk. And some of dem lef de wuk to go to jail.
Dem newspaper got de hardest job trying to keep reporters and press men. People does come fuh wuk as a reporter an as soon as dem got to really wuk is de last time you see dem. Dem boys seh most of de time dem wukking by walking from one media house to another.
Oil coming and Guyana talking bout how people gun be needed to wuk. Dem boys want to know wheh de oil company gon find dem. Is then Soulja Bai gon realize how much Andy Capp Guyana got.
Talk half and hope dem train people fuh wuk.

Discover more from Kaieteur News

Subscribe to get the latest posts sent to your email.

Latest News