Granny tun gunman

Apr 06, 2017 Dem Boys Seh, Features / Columnists, News

When dem boys was small dem use to love de cowboy movies. Dem was all de movies that dem boys wanted to see because dem parents use to buy gun and socket. Was a time when every young boy was a cowboy wid ee caps gun.
Was steady ‘war break’ and nuff noise till dem big people couldn’t ketch dem rest. De times change because de guns get real and people was really shooting others. De granny who live near de hotel had to be one of dem who use to play cowboy when she was young. That is why when she see a man she know good pun de fence, she shoot he.
When de man get shoot he fall down and dem had to rush he to de hospital wheh he still lying down. Dem boys was surprise that de man survive granny bullet. De woman had to read bout all dem shooting and decide that since goat ain’t bite she then she can shoot too.
She ain’t de only one who know bout stupidness. Irfaat know bout nuff stupidness. He calling pun de government to mek sure that dem check pun every expenditure that every Government department does mek. Of course he is de head of this committee that does check how de government money does spend.
From de time he call pun all dem auditors and government people to check how de money spending dem boys seh is a case of putting a thief fuh ketch a thief. He know wha he use to do. Dem had a big report how he use to keep he record in lead pencil. And he had a big eraser in he hand while he was mekking dem entries.
While he coulda rub out entries and expenditure and change de figures, NICIL got GNIC in a tight corner. De company seh how it pay all de money it owe but NICIL seh it still owe. De figures wasn’t written in pencil and no eraser coulda change dem.
Talk half and watch how thief man don’t like see he mattie wid bag.

Discover more from Kaieteur News

Subscribe to get the latest posts sent to your email.

Latest News