Dem boys seh...Guyana got a new cras

Dem boys seh…Guyana got a new cras

Jul 03, 2016 Dem Boys Seh, News

If is one thing people don’t like is when you call dem a crass. Dem foreigners does call de word ‘cross’ People don’t mind wearing a crass round dem neck or fuh some earring but don’t tell dem that dem is a crass. When that happen it mean that you blight.
Dem boys been to de airport de other day and dem hear some Customs people seh that a crass just pass through. Dem boys think that somebody was preparing to fetch something to prepare fuh Good Friday.
Is when dem see him boarding de plane and de Customs people seh, “Look de crass” dem boys know that dem was talking bout LouCrass. He fire lef, right and centre. De day he walk in de office and he ask people to sign a dismissal letter fuh a man nuff people refuse. De one who accept get immediate promotion.
People watch LouCrass never know nutten even when you ask him to tell you something that he do. He hire a young gyal as he office manager. He seh he trust this gyal because she can type. She got a spelling problem but LouCrass seh dem got spell-check.
When dem boys ask him why he employ this gyal and when he old office got staff, he seh he don’t trust nobody and besides, he don’t know. When dem boys ask him if de gyal wuk obeah pun him he seh he think so but he waiting pun de report. And in any case, he got to get legal advice.
Dem boys seh he and Jagdeo got de same rank. Both of dem controlling people and both of dem look like a crass. Both of dem like give order and both of dem believe that dem running dem own business and don’t have to account to anybody.
Dem boys want dem fuh know that de crass does come down. Jagdeo knock off Donald, Joseph O’Lall and all who challenge him. LouCrass might tek it pun heself fuh knock off Soulja Bai.
Talk half and run when you see a crass coming.