House maids paying more taxes than kantractahs

Jun 17, 2016 Dem Boys Seh, Features / Columnists, News

Nobody could seh that de Waterfalls paper was ever wrang. Whatever de paper seh for de last 22 years, come to pass. De forensic audits bring out only some of de stuff dem boys talk about.
Dem boys did talk that certain people tek GTT shares and seh dem sell it out. On to this day Soulja Bai can’t find de buyers. He can’t even find any paperwork to suggest who own it. That was a scam.
When de same people sell de drug company that was another scam yet to come to light. To this day Guyana don’t know who buy it, how much dem pay for it or if dem ever pay for it. All dem boys know is that Guyana lose it.
Guyana lose many, many more things including plenty money. Half of de money gone to dem kantractahs and de other half sitting in dem politicians cupboard.
In Jagdeo and Irfaat case, dem portion bury under dem swimming pool.
All this crookishness happen when Luncheon and he li’l dawg, Kwame Baow Waow was formulating de rules to defend de PPP.
Today, scampishness still going on. Joe Shanlin, de man who sit in Luncheon chair wid he li’l dawg, Me like ah Chi-ee-wa-wa, doing exactly de same thing.
De man who was Jagdeo main kantractah suddenly tun Joe Shanlin small brother. Dem boys seh he and nuff others mek so much money that if Soulja Bai should question dem taxes he would find out that even ee maid pay more taxes that all of dem.
Babbie, who own three-quarter of Guyana, got so much he don’t know what to do wid money. He bring in a printing press fuh respond to media criticism of him and all his crookishness.
Dem boys hear he does try a thing fuh respond but only he and Jagdeo alone reading wha print.
Dem boys hear another one bring in a printing press fuh do de same thing—that is to respond to media criticism and to explain he skullduggery.
Dem boys gun talk bout this later. All dem hear is that de paper will be called BT News.

Discover more from Kaieteur News

Subscribe to get the latest posts sent to your email.

Latest News