Today Jagdeo tun a bigger boy today

Jan 23, 2016 Dem Boys Seh, Features / Columnists, News

In some countries today would have been a national holiday. Dem boys don’t mek joke wid religion but at least de world does observe de birthday of two great men. In de modern day people does mek dem birthday holidays too. North Korea mek Kim Il Sung birthday a national holiday and when he dead dem mek he son birthday a holiday.
Now de son dead and dem mekking de grandson birthday a holiday. Dem boys seh that fuh some people birthday is a special thing.
When Jagdeo was president nuff restaurant would cook up a storm fuh him pun he birthday. If you go in some of dem and try to buy food dem would tell you that dem ain’t got none because somebody order all.
Friends use to tek money from de treasury to buy gifts to impress him. Dem boys seh that Jagdeo got a safe with more diamonds than de queen of England. He got some gold band too. Rob de Earth did tek some gold that he get from dem mines and he give Jagdeo as a gift.
One man even send a woman as a special gift. Dem boys seh that Jagdeo stop talk to that man and not because he was a moral person.
Well today is he birthday again. He collect he pension de other day and he decide that he gun spend some money pun a birthday bash. He only invite ten people. But dem boys promise to invade de party and stop it because when he was president he was de threatening person. He threaten everybody, even Sam and mek Sam resign.
He threaten doctors, that is why he don’t risk going to any hospital in Guyana. He frighten. He threaten dem air traffic controllers and he get he ministers to threaten dem diplomats. Dem boys intent to do more than threaten. Dem intend to invite him out and tek him to a place wheh dem think he gun get de best party of he life.
Dem gun tek he to a cell fuh de party of he life. De gift gun be a long sentence.
Talk half and tell Jagdeo to keep promise to sell he chandlier to de Waterfalls boss man.

Discover more from Kaieteur News

Subscribe to get the latest posts sent to your email.

Latest News