Latest update June 25th, 2026 12:41 AM
Dem boys seh… Is a New Year, tun round
Is a New Year and dem boys hoping that some people mek serious resolutions. Whole last year people exploit people, nuff of dem thief, some lie while others collect money under false pretences.
Dem cantractas tek people money fuh do wuk and dem do cock wuk. In some cases dem do no wuk; some smell de wuk like wha dem cantractas do wid de Parika billion-dollar contract and de Den Amstel billion-dollar contract. Some nah even look or smell de wuk but dem draw de money.
Dem boys can’t fuhget and dem looking again this year. But dem boys want know wheh dem does put all de money. One man seh that dem does put de money in dem CCH and that don’t mean Cacique’s Crown of Honour. De H stand fuh hole.
Then dem have de set wha does exploit guards. Dem does pay between $80 and $129 per hour. Dem guard wukking fuh less that half a beer per hour and it gun tek dem whole day and can’t even buy a proper Chinee meal.
But dem have de cantractas and some politicians who does help demself to between $80 and $129 million per hour. Dem boys does cry.
Dem watch this season and see how Kwame cock up he foot and win at de Main Big Lime. Dem want fuh know how he perform suh and he bend down and wine more bad when he see he bosses dem and de bodyguards.
He believe that de more he wine is de more he gun get promotion. But Donald done seh that he don’t want no Amy near to he belly.
Anyhow, is New Year and dem cantractas must stop de lawlessness. All who does thief must stap and tun a new leaf, which mean change direction, change you action, change you ways. Stap this wholesale thiefing.
Happy New Year you suckers.
Talk half. Lef half.
Share this:
Discover more from Kaieteur News
Subscribe to get the latest posts sent to your email.