Mind yuh lane before yuh mash up traffic

Dec 15, 2025 Dem Boys Seh, Features / Columnists

(Kaieteur News) – Dem boys seh the President tell people one time, “stay in yuh lane,” and plenty people get vex like he cuss dem mother. But is good advice, you know. Because in Guyana, nuff people don’t like dem lane. Everybody feel dem lane too small, too slow, or not important enough. So they start drift. And when drifting start, accident soon follow.

Now imagine government like a busy road in rush hour. Every Minister get dem own lane, mark out nice-nice with white paint and plenty responsibility. Health got he lane, Education got she lane, Public Works got one wide like the East Bank road, and everybody supposed to mind dem business and keep straight. But nah. One former lane-holder still blowing horn from the shoulder, waving hand, shouting directions, and trying to cut back in traffic like if dem never hand over the steering wheel.

Dem boys seh some people feel once dem touch a portfolio, that portfolio belong to dem for life, like family land. Even when dem move on, dem still peeping over the fence, counting bricks, measuring boards, and telling the new person, “nah, nah, you doing that wrong.” Is like ex-boyfriend behaviour: relationship done, but you still watching status and sending long voice notes.

The danger is this: when two people trying to drive in one lane, nobody reach nowhere. Confusion set in.

Dem boys seh drifting lanes cause pile-up. Ego crash into authority. Memory crash into reality. And next thing you know, instead of building road, hospital, or school, everybody arguing who first pour the concrete.

So dem boys advising: if you no longer in that lane, signal properly and move on. Enjoy yuh new lane. Fix yuh mirrors. Adjust yuh seat. Let the current driver drive. Because if everybody drifting all over the place, the whole country traffic going gridlock—and is the ordinary man who always get stuck in the jam.

Talk half. Leff half

Discover more from Kaieteur News

Subscribe to get the latest posts sent to your email.

Dem Boys Seh, East Bank road, Public Works, traffic

Latest News