Dem funerals causing traffic jam nowadays

Sep 29, 2025 Dem Boys Seh, Features / Columnists

Kaieteur News – Dem boys seh long time when yuh see a funeral passin’, people used to pull to de side of the road, tek off dem hat, and bow dem head. Dat was respect. These days, nobody gat time fuh respect. Dem gat time fuh road rage. Is like people competing fuh see who could blow horn de loudest while the hearse strugglin fuh turn out de street.

But leh we talk plain. Plenty ah dem funerals today creatin dem own disrespect. Funerals turn into roadblock exercise now. Yuh can’t even know if is a burial or a traffic protest. Cars double-park, triple-park, whole stretch of road done block. People spillin’ out from parlour to pavement, from yard to roadside. And dem who drivin’ pass does feel like dem stuck in a baby pram, pushin’ one inch every five minutes.

Dem boys seh respect is good. But yuh cyan respect de dead by disrespectin’ de livin’. Wuh kinda tribute is dat when yuh gat people missin’ dem appointment, people missin flight, and sick people stuck in a taxi while dem pain gettin’ worse? The man in the coffin done gone. He ain’t complainin’ bout traffic. Is de livin’ who leff fu bawl.

And leh we be honest. Some ah y’all who blockin’ de road at funeral don’t even know de deceased. Yuh just come fuh lime, see who wearin’ what, and taste if de cook-up nice after burial. Dem boys seh dat ain’t mournin. Leh we try remember de old way. Pull aside, let de procession pass neat and decent. If yuh park, do it where yuh ain’t blockin’ half de road. And if yuh gather, keep inside, not out pon the road like yuh own the highway.

Dem boys seh show respect by makin’ space, not by makin’ chaos. After all, death already hard. No need fuh add traffic to de sorrow.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, funerals, Traffic congestion, traffic jam

Latest News