Deh does wuk fuh scraps like dutty dawg

Jul 11, 2025 Dem Boys Seh, Features / Columnists

Kaieteur News – Dem boys seh every big man in politics got he lapdog. And not de kind dat barks when thief come in yuh yard. Nah! These ones does bark when de boss man seh bark. Dem does bite when de boss man wink. And if de boss man seh “Go dig dirt,” dem bringing back a whole graveyard!

Yuh see dem? Dem does wake up before de sun just to write two lie on Facebook. By lunch time, dem already send three anonymous voice notes, and before night fall, dem done call four radio programmes wid fake name to cuss people. All fuh what? Fuh lil pickings—lil free lunch, a likkle trip, and sometimes a likkle drink. De big ones up top sipping twelve-year-old rum, and dem hustlers pon de corner fighting fuh two-year-old mauby.

Dem boys seh when yuh see man always jumping to defend a politician more than he defend he own wife, check and see if he eating from de same pot. Or under de table. Or sometimes, under de floorboards! Dem got some who would sell dem own conscience fuh a selfie wid de minister. Smile bright, belly empty.

And leh we tell yuh, de politician ain’t got no respect fuh dem. To dem, dem is utensil—like fork and spoon. Use yuh to eat, then throw yuh in de sink. Some of dem does get treat like toilet paper—yuh know de rest. But dem fools still proud. Walking round like secret agent. Whispering, “I handle that.” Meanwhile, de big man don’t even remember dem name. Just press one button and replace dem like cheap lightbulb.

Dem boys seh, some people born fuh greatness, some fuh service. And some? Dem born fuh spread lies like fertilizer—plenty stink, but does make de grass grow for everybody else but demself. One day, when de scraps done and de lies dry up, dem gon realize dem was never soldier—just sponge. Soak up de nastiness and squeeze out when needed.

But by then, de dog food finish.

Dem boys seh, if yuh acting like utensil, don’t complain when dem put yuh in de drawer.

Talk half. Leff half.

Discover more from Kaieteur News

Subscribe to get the latest posts sent to your email.

Dem Boys Seh, Dutty dawg, Lapdog, Lies, Politics

Latest News