Latest update October 15th, 2026 10:30 AM
Cinema turn luxury like Marriott
Dem Boys Seh…
Kaieteur News – Back in de days, cinema use to be fuh poor people. A man use to walk in wid a dollar, buy a pit ticket fuh 50 cents, get a sweet drink and a lil sponge cake, and still got change fuh buy a Chinee brush later. Now? Yuh need a whole payslip and a small loan from de bank just fuh watch one movie.
Dem boys remember when you coulda walk in wid plantain chips and soft drinks in yuh bag. De ticket collectors didn’t care. Now? Yuh try walk in wid one cheese straw and see if you getting past security. Dem looking fuh see if yuh bag bulging – a sign that you may have more beverages and a box of fried chicken inside.
Is one movie yuh getting now, and yuh still paying close to $1,000 fuh de ticket. Back then, was double feature—two movies plus some newsreel wid Queen Elizabeth shaking hand wid somebody.
And don’t talk ‘bout de snacks inside de cinema now. It expensive. Two small popcorn, two drink, and some chips done reach $3,000. If yuh gat an average-sized family that can add up to rent money. And before de movie start good, popcorn done eat, nachos done done, and yuh still hungry.
Poor people now avoiding de cinema like it got COVID. Dem rather go seawall, sit on de jetty, and get breeze fuh free. That breeze more entertaining than some of de movies these days.
Dem boys seh is only people who get bonus or working Exxon contract going cinema regular. De rest of we waiting fuh de bootleg man come round or fuh de movie reach cable in three months. Is now a poor man got to choose—go cinema or buy lil groceries. And dem popcorn got more butter than sense.
Cinema was once fuh de masses. Now is fuh de classes.
Dem boys seh de only thing that ain’t change is how dark de place does get. But now, instead of holding yuh girl hand, yuh holding yuh head fuh how much money yuh spend.
Talk half. Leff half.
Share this:
Discover more from Kaieteur News
Subscribe to get the latest posts sent to your email.
Similar Articles
One thought on “Cinema turn luxury like Marriott”
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
Guyana copied everything like in the American Movie theatre.
You buy all the snacks in the lobby (Theatre owned) prior to enter
the viewing of show.