Africans fuh one day only

Aug 01, 2018 Dem Boys Seh, Features / Columnists, News

Today, people who was living like dem foreigners de whole year gon suddenly try to live like Africans, but just fuh today. Whole year dem was eating KFC and fish and chips. Some was eating Chinee food every opportunity dem get.
Things like foo foo and conkie and metem wouldn’t sell fuh dem. Pone and mauby wouldn’t touch dem mouth because it ain’t wha dem accustom to.
Dem boys was checking whole year to see who does cook African food in dem house during de year and dem could hardly find anybody. But today is sheer African print and sandals. Before today was heels and stockings, things dat even dem African women wearing these days.
Some place got cook-up competition and some place got metem competition. Whole night, last night people sit down to grate cassava to mek pone.
Dem boys seh dis African thing is really a once a year event. People does only eat African food once a year. Dem does wear all dem African print once a year. Fuh African people in Guyana, print is print; nobody don’t care dat a print is from Ghana or Senegal of Kenya because every country does have its own design.
Guyanese does wear any and everything. When some people step out if you see dem, you would think dem is from Ghana, Kenya and Nigeria all in one because all dem know is wha dem wearing come from Africa.
De niceness does come when is time to play games. Dem boys seh a man who hear bout Saal Pass and think he could play; de slap he get sting him between he sense and he nonsense. One lady sprain she foot seh she playing hopscotch like if hopscotch is an African game.
But is a nice day. Last night was de best thing because de drums talk. Dem boys hear some powerful drums dat had people dancing pon dem head. Years ago, people like Little Jones use to mek de event more sweet. Dat was at de soiree.
Talk half and enjoy it even if is fuh one day.

Discover more from Kaieteur News

Subscribe to get the latest posts sent to your email.

Latest News