Senior police officer creating nuff playthings

Jul 17, 2018 Dem Boys Seh, News

When people got power dem does believe dem is de biggest thing on earth. Some of dem does get so big that people does have to wonder if is de same people.
Dem boys seh de country got so many murders because once yon got a gun in he hand he feel that he got a big penis. De same thing when some money people run and buy a big car. When ordinary people get promote that is wuss that when a man got a gun or a big car.
Dem boys don’t want to talk bout de New Thriving incident because everybody talking bout it. De whole world see wha happen. Things meet de stage wheh people want Soulja Bai to get in de picture. Nutten don’t happen without him. In fact, some people believe that is he send de Minister to behave bad.
Now this same bad behavior deh in de police force. When a man is a constable he does beg but when he tun an officer he does demand. That is how dem have this commander who get promote. Is a long time dem boys hear that when a woman join de police force if she want to get promotion she got to learn to lie down.
Now dem got a senior officer who like an octopus. He grabbing every young policewoman who wukking in he district. Is like if dem is plaything and dem boys know how children does grab every plaything dem see.
Dem odda people in de force didn’t know till some of dem young woman complain. One complain how she had a steady night duty because she seh ‘No’. Another one claim how she does get some long shift.
At first, when she had to wuk late she thought it was de wuk. Is when de officer mek he approach in de dark that she realize wha happen.
A man tek this thing to heart and he write a letter to Soulja Bai because nobody ain’t listening. He copy de letter to de Police Complaints Authority. Dem boys seh Soulja Bai should mek this officer learn to lie down before he can get any more promotion.
Talk half and watch de police promotion list.

Discover more from Kaieteur News

Subscribe to get the latest posts sent to your email.

Latest News