Raw renk and bareface thiefing all over again

Jul 15, 2018 Dem Boys Seh, Features / Columnists, News

Christmas does come once a year but in Guyana, every day is Christmas and if you friend is de government you could get Christmas every hour. When Jagdeo was president he best friend Babbie get nuff Christmas. Every drug contract that he get was a Christmas gift and he get nuff Christmas gift.
De man above don’t sleep. He arrange fuh Jagdeo and he kavakamites get kick out. When that happen people believe that dem gun get to enjoy de money in de Treasury.
Dem didn’t know that de more things change de more dem remain de same. Soulja Bai come and is another set of thiefing going on. He give a man name Hard-datt in dis hard, hard guava season, $367 million in 24 hours.
This same man never even bring a Whizz or a Panadol or any pain killer fuh he family in Guyana. Dem boys believe he don’t even know de difference between a Panadol and Vicks. Is eye pass fuh Guyana all over again.
This man set up a company in Guyana since 2012 without an office. A matter fact, is a empty lot pun de East Coast he list as de company address.
He never do no business; never pay a cent tax from 2012 till today yet a Permanent Secretary, de one wukking at de Ministry of Health, tell de nation how this man do business all over Guyana.
Dem boys want to know wha kind of business he do. It had to be de sex business because that is de only business you don’t pay tax on in Guyana.
She cancel three bids from companies who normally supply drugs to de country and fuh far less. De only reason she would knock out dem companies and give Hard-datt fuh double de cost is because Soulja Bai must be asking fuh he share.
Dem boys always believe he clean but when so much raw-renk corruption going on under he nose dem boys believe he setting stage fuh he generation to come.
De worst part is dem boys hear no drugs deliver as yet and more than a year pass. This was suppose to be emergency drugs.
Talk half and hope SARA recover de people money.

Discover more from Kaieteur News

Subscribe to get the latest posts sent to your email.

Latest News