Kwame got nuff ambition

Jun 30, 2018 Dem Boys Seh, Features / Columnists, News

Statia get more raise than he ever get in he life. A man sit down and look at wha Statia do after he tek over from Sat-R. Sat-R use to keep he hand pun de phone because Jagdeo use to call steady and tell he who to give tax break and who to give back de money dem pay.
When Sat-R move too slow, Jagdeo bring in a man from Canada as he number two. De two of dem mek nuff businessman smile and dat is why all of dem use to seh how money flowing in Guyana. It wasn’t dem money.
Statia tek over and he mek everybody watch everybody else. People who use to run cow and build house suddenly settling walking pun de road and begging people fuh a raise.
Dem boys seh never trust a man who bribe you. De day yuh tun useless is everybody know how you use to stretch you hand. Dem was de people Statia ketch and send home. And he ketch dem easy because dem end up tackling de businessmen fuh a raise, even when de people tekking a drink.
But if dem boys think GRA bad, dem didn’t see wha happen inside de PPP. Everybody suddenly believe dat dem got de potential to be president. Kwame step up and announce dat he want to be de PPP presidential candidate.
Well dem boys laugh at de answer Jagdeo give him. Jagdeo look at dis man who he does still hug up and keep he close to ee chest and ask him if de presidency ain’t got no class. He forget dat when Janet mek him president, people ask she de same thing. Is just dat she was stubborn and didn’t listen.
She pass on but de rest of de nation see how all of a sudden de word president mean thief. Since dem boys seh government, people seh thief. Soulja Bai walking round with disinfectant to avoid de smell. Thief man got a smell.
Ashni know bout dat smell. When he come home, he hear people asking, “Wha smell suh?”, when he pass. Cologne can’t hide thief man smell. Dat is why he refuse to come to court yesterday fuh answer more charges. He rather forfeit de $6 million bail.
Talk half and get ambition like Kwame.