Dem boys seh Buy a drug bond fuh $25M and mek $250M profit in two years

Jun 26, 2018 News

Lloydie got to be de greatest investor in de whole world. He better than Donald Trump and fuh sure he mek Bill Gates look like stupidness. All dem inventors like de man who mek Facebook or de people who invent Twitter who Trump like use, or dem who mek WhatsApp can’t match Lloydie.
He tie up a deal wid Dr. George who tek orders from Li’l Joe. But dat wasn’t de investment. Lloydie buy a property fuh $25 million. If he did put dat money in de bank, he woulda get at de most $250,000 in profit fuh de same time he rent it.
Dem boys nearly dead when dem hear dat between 2016 July and March 2018, he collect $264 million in rent. Anybody know dat right away, de profit is more than $250 million by now because he still collecting rent.
He do better than Babbie when Jagdeo use to give him all dem pharmaceutical contract. Babbie never mek such a profit and nobody in de history of Guyana who rent property ever mek dat kind of money.
Dem special prosecutor in de thick of things too. All of dem get $2 million fuh a retainer. Then fuh every hour dem stand up in de court, dem get $20,000. And wha mek de thing more sweet is if dem stand up and argue fuh one hour and five minutes, dem getting money fuh two hours.
Dem boys seh dem now understand why dem special prosecutor quick fuh ask fuh adjournment. De life sweet! Anil know how sweet it is to be a special prosecutor. He was one. De only thing is dat he use to get more than wha dis set getting.
It look like if is de same game, same rules but different players. Money use to flow just like dat when Jagdeo was president. It flowing de same way under Soulja Bai.
Talk half and don’t believe dat money not circulating.

Discover more from Kaieteur News

Subscribe to get the latest posts sent to your email.

Latest News