Soulja Bai hands tie up

Apr 08, 2018 Features / Columnists

People got a saying that every cow does cry fuh its calf. Dem got a lot of crying going on. Lula gone to jail and he supporters crying. He popular and once he did run in de elections he woulda beat everybody.
But he mek he hand fast. Money that ain’t belong to him he go and trouble. Dem boys want to know how people who got nuff money always want more. Brazil is now leading by example. No matter how popular a man is, once he corrupt he going to jail.
Soulja Bai had that belief when he go into office. He call nuff inquiry and get de results. But he still can’t do nutten wid de findings. Is like when you look in de mirror. That is wha dem boys seh. All of a sudden he finding out that some of he people corrupt and dem would also end up in jail. He hand tie.
But he should know that jail must pick everybody who thief. That is wha should happen. Imagine ExxonMobil, de most powerful oil company in de world do nuff wrang things. Dem courts slapping some big fines pun it. But dem boys notice that de fines can’t hurt de oil company. Wha dem pay wid one hand dem collecting from Guyana.
That is why de contract is how it deh. When dem boys look at de contract wid odda country is like when a man and a woman hug up tight pun one side and dem squeezing de stepchild pun de odda side. Guyana is de step child.
Liberia cut some special deal wid Exxon. When dem boys hear bout de deals dem want to know if goat bite Guyana. Liberia walking in de house like de don and cutting deals wid de odda boss. But dem got Guyana like de beggar at de gate.
When dem boys talk some people get vex and cuss dem critics. Exxon is somebody calf. When de ambassador talk he was just like de cow that cry fuh its calf.
Talk half and help Soulja Bai mek up he mind.

Discover more from Kaieteur News

Subscribe to get the latest posts sent to your email.

Latest News