Latest update October 20th, 2026 11:34 AM
Big man tun putty
Dis week nuff people do some stupidness. And all of dem ain’t live in Guyana. De news media report how a woman pick up a gun and shoot up You Tube because she ain’t mek nuff money from she video. Dis is a woman who think she was famous.
She end up shooting she boyfriend and two other people before she shoot she self. Dem boys seh dat if is fame she want she get it when she shoot she self. Dis particular story mek international news fuh days.
In Guyana, two man kill dem woman but dem didn’t have de guts to kill demself. One of dem shoot a woman 14 times. He guh to court yesterday and dat is when he get dem boys vex. He shoot de woman; then he stand up over she and shoot she till he gun empty.
De man, like a real bravado, jump in he car and drive to the nearest police station. He give a statement and mek heself big. Then when he guh to court, he start fuh cry like a baby. Dis man cry; snot run from he nose. People can’t believe dat is de same man who shoot a woman and then tell he friends he can bet dat she not going anywhere dis month end.
He tun from stone to putty.
Somebody else play big man and slap a big man. Dis was a 16-year-old boy who get a gun from somebody. He see a big man pun de road, rob him then he slap him and tell de big man to guh lang he way.
When de police ketch him, he still believe dat he is a big man. Dem boys want him to get big man treatment. Dem had one like him. Cobra was 17 when he do de gods. De day when he surrender and de police go to pick him up, he cry like a baby.
Talk half and watch big man tun li’l boy
Share this:
Discover more from Kaieteur News
Subscribe to get the latest posts sent to your email.
Similar Articles
Website Hits
Blunt of the day
Sports
Features/Columnists
Sir. Ronald Sanders
The GHK Lall Column
Weekend Cartoon
